ახლადრეაბილიტირებულ მერვე ბაგა-ბაღში, დღეიდან სასწავლო-სააღმზრდელო პროცესი განახლდა.
მე-8 ბაღი რუსთავის მერმა ნინო ლაცაბიძემ, პირველ მოადგილე კახა გურულთან და საკრებულოს ფრაქცია ,,ქართული ოცნების“ წევრებთან ერთად დაათვალიერა.
,,რუსთავში დასრულდა კიდევ ერთი ბაღის სრული რეაბილიტაცია. დღეს განახლდა სასწავლო პროცესი მე-8 ბაგა-ბაღში. 2022 წელს, ბაღებში სხვადასხვა ინფრასტრუქტურული სამუშაოსთვის, ჯამში 3, 4 მილიონ ლარზე მეტი დაიხარჯა. ეს პროცესი 2023 წელსაც აქტიურად გაგრძელდება და პრემიერის ინიციატივით, რუსთავში არსებული სხვა ბაგა-ბაღების სრული რეაბილიტაცია მოხდება“, – განაცხადა რუსთავის მერმა ნინო ლაცაბიძემ.
მიმდინარე წელს, ინფრასტრუქტურული პროექტის ფარგლებში, სარემონტო სამუშაოები ჩაუტარდა საბავშვო ბაღის შენობის მეორე სართულს, ხოლო საძირკვლის გამაგრება და პირველი სართულის რეაბილიტაცია, 2019 წელს განხორციელდა.
,,ქალაქის მერიამ კიდევ ერთი ბაღის, ამჯერად ქალაქის ძველ უბანში, ერთ-ერთი ისტორიული შენობის რეაბილიტაცია დაასრულა. მინდა მივულოცო პატარებს, პედაგოგებს ამ ისტორიული ბაღის შენობისთვის ახალი სიცოცხლის მინიჭება და მადლობა გადავუხადო ქალაქის მერიას აქტიური მუშაობისთვის“, – განაცხადა რუსთავის საკრებულოს ფრაქცია ,,ქართული ოცნების” წევრმა თამარ გოგაძემ.
ბაგა-ბაღში 160 აღსაზრდელი ირიცხება და ისინი სექტემბრიდან დღემდე ქალაქის რამდენიმე ფილიალში იყვნენ გადანაწილებულნი.
2022 წელს, რუსთავში ბაგა-ბაღების შენობების რეაბილიტაციის ფარგლებში, 3.4 მილიონი ლარის სხვადასხვა ინფრასტრუქტურული სამუშაო ჩატარდა და ამ ეტაპზე, ძველ რუსთავში #1 ბაღის ისტორიული შენობის სრული რეაბილიტაცია მიმდინარეობს.
პრემიერ-მინისტრის გადაწყვეტილებით, 2023 წლის 1 იანვრიდან, საბავშვო ბაღების მშენებლობა-რეაბილიტაციის პროგრამა მთელი ქვეყნის მასშტაბით, მათ შორის რუსთავშიც აქტიურად დაიწყება. პროექტი სამ ეტაპად განხორციელდება და მისი ღირებულება 1 მილიარდ 300 მილიონი ლარი იქნება.
